Landssamtök sauðfjárbænda

Bókanir í sauðfjárbændaferð til Noregs hafnar

Fimmtudagur, 26. janúar 2012 11:37
Eins og kynnt hefur verið í Bændablaðinu þá standa Landssamtök sauðfjárbænda og Ferðaþjónusta bænda fyrir sauðfjárbændaferð til Noregs dagana 8.-11. mars nk. Við ætlum að heimsækja frændur okkar Norðmenn í þessari ferð, skoða bú af mismunandi stærð, líta í fjárhús og aðra áhugaverða staði - og að sjálfsögðu njóta þess að vera saman. Eftir flug til Oslóar verður haldið til ólympíubæjarins Lillehammer, en á leiðinni þangað komið við í Domkirkeodden í Hamar. Einnig verður komið við í sæðingastöð Norsk Sau og Geit (NSG) þar sem við kynnumst norskri sauðfjárrækt og starfi NSG. Gist verður í Lillehammer í tvær nætur. Á föstudeginum munum við skoða okkur um í Lillehammer og þar í kring. Viðkomustaðir fara eftir veðri og aðstæðum. Á laugardeginum njótum þess að eiga heilan dag undir leiðsögn NSG, systursamtaka Landssamtaka sauðfjárbænda í Noregi, þar sem farið verður í heimsóknir til bænda. Síðan verður haldið til höfuðborgarinnar Oslóar og gist þar í eina nótt.. Við eigum frjálsan dag í Osló á sunnudeginum áður en haldið er út á flugvöll um kvöldið. Nánar hér að neðan.
Nánar...

Margs spurt

Miðvikudagur, 25. janúar 2012 10:19

Einar K. Guðfinnsson þingmaður Sjálfstæðisflokksins í Norðvesturkjördæmi hefur lagt fram þrjár fyrirspurnir á Alþingi sem tengjast díoxínmálinu í Skutulsfirði. Einar spyr umhverfisráðherra um niðurstöður mæliinga á jarðvegi, velferðarráðherra um heilsufarsmælingar á íbúum og sjávarútvegs- og landbúnaðarráðherrar um mælingar á lambakjöti og beitartilraun MAST og LS sl. sumar. Þessu ótengt spyr Einar efnahags- og viðskiptaráðherra um áhrif banns við forverðmerkingum á verðlag kjötvara.

Sigmundur Ernir Rúnarsson þingmaður Samfylkingarinnar í Norðausturkjördæmi vill síðan að sjávarútvegs- og landbúnaðarráðherra svari því hversu mörg sauðfjárbú eru í landinu, hversu mörg þeirra hafi fengið athugasemdir við búfjáreftirlit og hver sé kostnaðurinn við eftirlitið.

Við öllum ofangreindum fyrirspurnum er óskað munnlegs svars svo væntanlega verða stuttar umræður um hverja og eina.

Staða dýralæknamála

Þriðjudagur, 24. janúar 2012 00:00

Svo sem kunnugt er þá hafa margir haft áhyggjur af stöðu dýralæknaþjónustu í framhaldi af því nýja fyrirkomulagi sem tók gildi 1. nóvember sl.

Þann 19. janúar síðastliðinn fór fram umræða á Alþingi um málið að frumkvæði Sigurðar Inga Jóhannssonar þingmanns Framsóknarflokksins í Suðurkjördæmi. Til svara var Steingrímur J. Sigfússon, sjávarútvegs- og landbúnaðarráðherra. Þáttakendur voru úr öllum flokkum nema Hreyfingunni. Allir ræðumenn höfðu áhyggjur af málinu en ráðherra gaf engar yfirlýsingar um hvort aðgerða væri að vænta. Hann benti þó á að MAST ætti reglulega að endurmeta þörf fyrir þjónustuna.

Þeir sem áhuga hafa geta kíkt á umræðuna hér.

Fleiri greinar...