Fundargerð formannafundar 2009

Fundargerð formannafundar Landssamtaka sauðfjárbænda 2009. Fundurinn var haldinn í Bændahöllinni í Reykjavík, 13. nóvember 2009.

Formannafundur Landssamtaka sauðfjárbænda

Bændahöllinni, 13. nóvember 2009 kl. 13.00

Þetta gerðist

Sindri Sigurgeirsson formaður LS setti fund og tilnefndi Þórarinn Pétursson sem fundarstjóra og Sigurð Eyþórsson sem fundarritara. Ekki komu fram fleiri tillögur og tóku þeir því til starfa.

Dagskrá

Staða á markaði

Sigurður Eyþórsson framkvæmdastjóri LS fór yfir sölutölur fyrstu 10 mánuði ársins samanborið við sömu mánuði frá 2001. Innanlandssala dilkakjöts er 13% minni en í fyrra og svipar til áranna 2002 og 2003. Samdráttur í afsetningu er þó aðeins 2% vegna aukins útflutnings og birgðir eru minni en tvö síðustu ár. Sigurður fór einnig yfir helstu útflutningsmarkað og skiptingu þeirra eftir magni og útflutningsverðmæti. Noregur, Bretland og Færeyjar eru sem fyrr okkar mikilvægustu markaðir. SE svaraði síðan fyrirspurnum.

Skuldastaða sauðfjárbænda

Jóhanna Lind Elíasdóttir fór yfir vinnu BÍ varðandi skuldamál bænda. Farið hefur fram mikil vinna í samvinnu við fjármálastofnanir til að leita lausna. Þar hefur verið lögð áhersla á að tekið verði tillit til þeirra mála sem eru sérstök hvað varðar landbúnaðinn s.s. samþættingu og heimilis og rekstrar, eðlilegs jarðamats og eðlilegra launakrafna. Ákveðin lausn er í vinnslu sem má líkja við frjálsa nauðasamninga en hún er ætluð búum þar sem önnur úrræði duga ekki til og byggir á því að allir kröfuhafafar komi að borðinu. JLE vakti jafnframt athygli á því að þessi endurskipulagning gerði kröfum um ítarlega skoðun á rekstri hvers bús fyrir sig. Gagnagrunnur BÍ með bókhaldsgögnum úr dkBúbót gegndi þar mikilvægu hlutverki en um 270 bændur hafa nú skilað ársreikningum inn í grunninn. JLE svaraði síðan fyrirspurnum.

Starf aðildarfélaganna

Formenn þeirra aðildarfélaga sem mættir voru til fundarins gerðu stutta grein fyrir störfum félaganna:

Þórarinn Ingi Pétursson, Fsb. Eyjafirði: Bar kveðjur frá Birgi Arasyni sem ekki á heimangengt. Félagið kom að samkeppninni “Þráður fortíðar til framtíðar” sem haldin var á Hrafnagili. Áætlað að halda upp á 25 ára afmæli félagsins á næsta ári.

Sigríður Jónsdóttir, Fsb. Árn: Hafa fengið gestafyrirlestra á aðalfundi. Margir fjáreigendur á svæðinu með fáar kindur og félagið breytti lögum sínum svo þeir gætu starfað með. Áhugi á að skipuleggja hópferð að Hesti á næsta opna degi þar.

María Dóra Þórarinsdóttir, Dsb. í Bsb. Kjalarnesþings: Ekkert sjálfstætt starf en fjárræktarfélögin eru virk. Sagði frá mikilli grósku í fjáreigendafélagi Grindavíkur og áætlunum sveitarfélagsins um skipulögð fjárhúsahverfi. Hafði áhyggjur af síaukinni umferð göngufólks og lausra hunda um beitilönd.

Þóra Sif Kópsdóttir, Fsb. Snæfellsnesi: Félagið hefur gengist fyrir ferðum og unnið í samstarfi við fjárræktarfélögin á svæðinu s.s. varðandi héraðssýningu. Smærri fjáreigendum er að fjölga.

Aðalsteinn Jónsson, Fsb. Héraði og Fjörðum: Lýsti ánægju með fundi LS í ágúst. Félagið hefur verið að berjast fyrir því að flutningar á gripum verði á einhvern hátt takmarkaðir inn á svæði þess til að verjast t.d. tannlosi og kýlapest. Einnig hafa verið fluttar geitur úr garnaveikissýktu hólfi inn á svæðið. MAST hefur ekki svarað neinu um það. Einnig er enn ekki ljóst hver á að bera kostnað af eða framkvæma nauðsynlegar garnaveikisbólusetningar á svæðinu vegna tilfella sem komu þar upp fyrir nokkru. Áætlanir eru um ýmiskonar starf s.s. rúningsnámskeið, uppskeruhátið og ferðalag.

Einar G. Örnólfsson, Fsb. Borgarfirði: Félagið kom að undirbúningi Sauðamessu sem tókst vel þrátt fyrir leiðindaveður. Þar voru m.a. veitt ný verðlaun fyrir besta árangur í ræktun. Félagið gefur auk þess út Smalann eins og kunnugt er. Áætlanir eru um stutta fræðslufundi í hádeginu, ferðalög og fleira.

Ásmundur Daðason, Fsb. Dalasýslu: Félagið gekkst fyrir tveggja daga ferð á Snæfellsnes og var þátttaka góð. Þá fer haustfagnaður félagsins sífellt stækkandi ár frá ári og stóð nú yfir í tvo daga samfleytt með fjölbreyttri dagskrá. Hvatti félögin til skoða möguleika á svona hátíðahöldum á sínu svæði og búa til dagskrá í kringum það. Greindi frá því að hann gæfi ekki kost á sér áfram á næsta aðalfundi og þakkaði samstarfið á þessum vettvangi.

Ármann Guðmundsson, Dsb. í Bsb. A-Skaftafellssýslu: Ekki um neitt sjálfstætt starf að ræða utan aðalfundar en stjórnin hefur komið saman.

Böðvar Sigvaldi Böðvarsson, Fsb. í V-Húnavatnssýslu: Reynt að vera með gesti á aðalfundi og þar eru veitt verðlaun fyrir góðan árangur í ræktun. Gert var átak í að afla nýrra félaga og stefnan sett á 100 félagsmenn. Jafnframt er verið að endurskoða lög félagsins. Ályktað var um útflutningsverðið í fyrra og félagið tók þátt í hátíðahöldum vegna afmælis KVH á Hvammstanga. Greindi frá því að hann gæfi ekki kost á sér áfram á næsta aðalfundi og þakkaði samstarfið á þessum vettvangi.

Einar Ófeigur Björnsson, Dsb. í Bsb. N-Þingeyjarsýslu: Erfitt að greina á milli starfsemi búnaðarsambandsins og deildarinnar. Aðalfundur hefur venjulega verið seint vegna áreksturs við Búnaðarþing. Sigurður Sigurðarson kom á vegum félagsins til N-Þing í vor og krufði lömb sem drápust á sauðburði. Í framhaldinu var haldin vel heppnuð sauðburðargleði þar sem niðurstöður voru kynntar.

Erlendur Ingvarsson, Fsb. Rang: Reynt hefur verið að auka samvinnu félaganna á Suðurlandi m.a. með verkefni um framleiðslukostnað sbr. greinar í Bændablaðinu þar um. Félagið gekkst fyrir degi sauðkindarinnar í fyrra með góðum árangri, þar sem voru veitt verðlaun fyrir góðan árangur. Félagið tók jafnframt þátt í Sumarhátíð í Rangarárþingi með því að heilgrilla lambaskrokka. Þar var einnig fé til sýnis. Þá var gengist fyrir ferð til Færeyja haustið 2008.

Þorvaldur Þórðarson, Dsb. í Bsb. Vestfjarða: Aðalfundur er haldinn að sumri til vegna erfiðra samgangna og þá í tengslum við aðalfund búnaðarsambandsins. Fyrirlesarar hafa verið fengnir á aðalfundi. Sauðfjáræktarfélögin sjá um kynbótastarfið.

Lárus H. Sigurðsson, Fsb. á Suðurfjörðum: Starfið snýst að mestu um aðalfundina. Þar er reynt að fá gestafyrirlesara og fundirnir hafa verið vel sóttir. Til athugunar að halda upp á 25 ára afmæli félagsins á næsta ári.

Arnór Erlingsson, Fsb. í S-Þingeyjarsýslu: Engir sérstakir viðburðir utan aðalfundar en fjallað um ýmis mál sem upp hafa komið s.s. niðurröðun sláturfjár, kjötmat, rafmagnsverð í dreifbýli og förgun hræja.

Guðbrandur Björnsson, Fsb. í Strandasýslu: Félagið fjallar eingöngu um kjaramál. Áhyggjur eru af framtíðarskipan varnarlína og viðhaldi þeirra, en fjögur varnarhólf eru í sýslunni. Fundarhöld eru oft erfið vegna samgangna við Árneshrepp en félagið hefur gengist fyrir ferðalögum m.a. í Húnavatnssýslu.

Jón Kristófer Sigmarsson, Fsb. í A-Húnavatnssýslu: Félagið hefur gengist fyrir bændahátíð þar sem m.a. eru veitt verðlaun og haldið hvatningarfundi með ráðunautum.. Á í samskiptum við MAST vegna litar á eyrnamerkjum en engin svör hafa borist. Hvatti til nánari rekstrargreininga þ.e. að fá fram kostnað pr. kind eða kíló.

Atli Már Traustason, Fsb. Skagafirði: Félagið veitir verðlaun á aðalfundi og gengst fyrir ferðum. Það hefur einnig komið að bændadögum KS og hélt 100 manna árshátíð í síðasta ári. Þá hafa verið haldnir smærri rabbfundir víða á félagssvæðinu.

Fanney Ólöf Lárusdóttir, Fsb. V-Skaftafellssýslu: Hvatti til meiri samvinnu félaga á Suðurlandi. Fengnir hafa verið gestafyrirlesarar á aðalfundi og áætlanir um ferðalag í vor og e.t.v. uppskeruhátíð.

Formaður þakkaði skýrslurnar og taldi mikilvægt að félögin gætu skipst á upplýsingum.

Störf stjórnar LS

Sindri Sigurgeirsson fór yfir helstu verkefni stjórnar LS frá aðalfundi. M.a. breytingar á búvörusamningum, vinnu við verðlagsgrunn, stefnumótunarverkefni, ESB mál, fundarferð LS í ágúst, ferð á ráðstefnu í Brussel og margt fleira. Þá fór hann yfir breytingar sem gerðar hafa verið á Markaðsráði kindakjöts, hugsanlegt samstarf um útflutning, umfjöllun vegna nýskipunar varnarhólfa og heimsóknir til afurðastöðva. Ennfremur ræddi hann hugmyndir um breytt fyrirkomulag aðalfundar vegna 25 ára afmælis LS á næsta ári.

Hann bað fundarmenn síðan að fjalla um sínar skoðanir á fundaherferðinni í haust og um nokkrar hugmyndir sem fram hefðu komið í heimsóknum til afurðastöðva s.s. að færa geymslugjöld beint til bænda með álagsgreiðslum, greiða álagsgreiðslur á grip en ekki kíló, frekari sameiningu afurðastöðva og

greiðslur fyrir kjöt eftir þyngdarflokkum og tímabilum m.t.t. til að lömb séu stundum orðin of stór og þung.

Almennar umræður

Aðalsteinn Jónsson: Ræddi nauðsyn þess að leysa úr málum varðandi varnarlínurnar. Skynsamlegt væri að veita bakstuðning fyrir útflutningsverkefni s.s. með fræðsluefni. Nefndi að menn þyrftu að geta gert sér grein fyrir hvað þynging á haustlömbum kostaði en þau gætu vel verið of stór og þung í sumum tilvikum. Taldi ekki skynsamlegt að fara að greiða álagsgreiðslur á gripi í stað kílóa en var opinn fyrir frekari sameiningu afurðastöðva.

Baldur Grétarsson: Taldi nauðsyn á frekari reglusetningu um fjárflutninga vegna sjúkdómavarna ef ekki ætti illa að fara.

Böðvar Sigvaldi Böðvarsson: Líst illa á hugmyndir um gripagreiðslur. Taldi að nú þegar væri greitt hærra fyrir léttari lömb sbr. að fyrir O2 og R3 væri greitt svipað kílóverð þó ívið hærra fyrir O2 . Meðalþyngd skrokka á landsvísu sem færu í R3 væri hátt í 4 kg. meiri en meðalþyngd skrokka sem fara í O2, en sláturkostnaður sá sami á hvern dilk, án tillits til þyngdar. Svipaða sögu væri að segja ef aðrir flokkar eru bornir saman með þessum hætti. Sláturleyfishafar yrðu hreinlega að aðlaga verðskrár sínar, ef þeir teldu lömb vera orðin of þung.

Arnór Erlingsson: Ánægður með fundaferðina en vildi fá fleiri fundi. Opinn fyrir frekari fækkun afurðastöðva.

Erlendur Ingvarsson: Benti á að 12-15 kílóa lömb væru oft misjöfn að gæðum. Taldi ekki skynsamlegt að fækka húsum þó fyrirtækjum fækkaði og spurði hvort að þau væru ekki fullnýtt nú þegar. Minnti á að nýta þyrfti alla fjármuni í sauðfjársamningi.

Einar Ófeigur Björnsson. Ánægður með fundina, þeir voru á góðum tíma en þurfa að vera fleiri. Varðandi varnarlínur væri mikilvægast að þeim sem eiga að standa yrði haldið við á fullnægjandi hátt en á það skortir núna. Leist alls ekki á gripagreiðslur og ekki heldur á sameiningu afurðastöðva en taldi aukna samvinnu koma vel til greina. Sláturleyfishafar yrðu að beita verðskrám séu þeir að óska eftir léttari eða öðru vísi lömbum en þeir eru að fá í dag. Óvíst með geymslugjöldin en það yrði að skoða í samhengi við annað. Ræddi einnig heimtökurétt sem nú er útfærður á mismunandi hátt á milli afurðastöðva.

Lárus H. Sigurðsson: Leist ekki á gripagreiðslur og heldur ekki á breytingar á geymslugjöldum. Aukin samvinna milli afurðastöðva væri jákvæð en þær yrðu að ræða það hvað væri raunhæft og skynsamlegt að fá út úr því.

Ásmundur Daðason: Ánægður með fundina. Hafði litlar skoðanir á sameiningu afurðastöðva sbr. að það er ekkert sláturhús á Vesturlandi. Tók fram að mjög óskynsamlegt væri að fara út í einhverjar breytingar sem gætu þýtt að taka þyrfti upp sauðfjársamninginn aftur.

Ármann Guðmundsson: Tók undir sjónarmið um fleiri fundi og um andstöðu við gripagreiðslur. Hvatti til aukinna tengsla við neytendur s.s. fleiri uppákomur með heilgrillun o.s.frv.

Þóra Sif Kópsdóttir: Ánægð með fundina en þeir þyrftu að vera fleiri. Góður fundur í dag og gott að heyra frá öðrum félögum. Nefndi að skipulag á fjárflutningum væri í ólagi. Sláturhúsin eiga að láta það sjást í verði ef þau óska eftir léttari lömbum. Fara þyrfti betur yfir kosti og galla sameiningar en ekkert væri útilokað. Tók undir sjónarmið um að MAST stæði sig illa við að viðhalda varnarlínum.

Fanney Ólöf Lárusdóttir: MAST þarf að upplýsa mun betur um sjúkdómastöðu á einstökum svæðum ef ekki á lengur að verjast ákveðnum sjúkdómum. Bændur hafa ekki aðgang að þessum upplýsingum í dag. Ef það þarf að opna sauðfjársamningin að til að breyta álagsgreiðslum vegna gæðastýringar úr kílóagreiðslum í gripagreiðslur að þá er það ekki ráðlegt að fara þá leiðina. Ræddi síðan markaðsmál.

Fundarstjóri lokaði mælendaskrá þar sem fundurinn var kominn fram úr tímaáætlun. Gaf Sindra orðið.

Sindri Sigurgeirsson svaraði fyrirspurnum, fór yfir fyrirkomulag heimsóknar í Ístex sem var á dagskrá að loknum fundi og sleit honum síðan

Fundi slitið kl. 17.10.

Fundargerð ritaði Sigurður Eyþórsson.